:: 香港青年協會賽馬會媒體空間 M21 ::

Ep.32 青春

青春係年輕嘅代名詞，有人會話青春係一種心態；亦有人會話青春有年齡限制；今集就同音樂劇演員 Ashia 研究吓，青春代表住啲乜，係讀書時期唔使憂柴憂米、嘅時光，抑或係直到現在仍然勇於追夢、透過音樂劇發揮無限可能嘅自己。願大家都青春永駐！

是日Amazing嘉賓：Ashia 廖嘉敏｜歌手｜音樂劇演員

Ep.31 團圓

由蠟燭燈籠到LED 閃光玩具；由雙黃白蓮蓉到威靈頓月餅；中秋對不同年代有不同象徵代表，但離不開就是一家團圓。時代會變，人情不變，今集一齊傾下，唔同年代人士嘅中秋節係點過，中秋嘅意義又究竟係啲咩。

Ep.30 道歉的藝術

對唔住，三粒字，可以好易，都可以好難。由細個開始，父母已經有教，做錯事就要講對唔住；但呢三粒字背後有咩意思，大家嚟到呢一刻，又係咪真係明？隨住人生不同經歷，大家總會講過呢三粒字，有人可能已經熟習到行禮如儀；有人可能每次都感覺有千斤重；今集由唔同年代嘅人，一齊研究，一句對唔住，可以有幾多變化。

是日Amazing嘉賓：Pearl

Ep.29 一個人的浪漫

相信大部分年青人，都有一個共同願望，就係自立門戶，過獨居生活；但現實就係，無論土地問題抑或財政問題，「一個人住」似乎都只能維持喺想像之中；呢一刻，無論係同父母住、同朋友住、甚至係同伴侶住嘅你，對於「同自己住」嘅呢一份渴望，究竟係點樣產生？幻想世界，又係有幾美好？今集一齊研究呢份一個人嘅浪漫。

Ep.28 熱血合唱魂

人生，總會有追求，嘗試回想年輕嘅你，可能係讀書、可能係興趣、可能係偶像，大家曾幾何時都有過一股傻勁，不顧一切去追去拚；但隨住年紀，隨住經歷，隨住現實，去跑、去追、去拚嘅能量，或多或少都總會有所減退。或者喺灰心失落時，心裡面都會問，當日嘅熱血，去咗邊呢？今集就由一位熱血中學生，同大家分享佢嘅熱血合唱魂，希望幫到大家搵返呢股前進嘅動力。

是日Amazing嘉賓：Kristina

Ep.27 邊一個發明了返工

年青人大學畢業投身社會工作，普遍年齡為21－23歲，當然亦有更早的可能；雖然香港並無法定退休年齡，但以強積金可提取年齡為65歲作參考，即係人生即將要工作至少40年，要迎接一個40年嘅未知，可能好多年青人都會有一個迷思，返工到底為咩？爲份人工、養家？返工到底要付出啲咩？付出勞力、青春？今集就由M21嘅老朋友，同時亦係職場嘅新鮮人，一齊研究一下。

是日Amazing嘉賓：Kristy aka 吳笑

Ep.26 HEADxHUNTER

投身社會工作，好多人都好怕要搵工，但偏偏有份工，唔止幫人搵工，仲會幫工搵人，坊間對呢個職業有一個稱呼，就係「獵頭公司」。究竟獵頭呢門職業，真正係做啲乜嘢？工作有咩特別要求？箇中又有幾多鮮為人知嘅秘密，今集就由資深從業員為大家解答。

是日Amazing嘉賓：Samson Ho

Ep.25 校規之匪夷所思

國有國法，校有校規。職場上，打工仔就遵守員工守則，按公司既有規矩辦事；求學上，學生返學就要遵守校規，從小養成生活中的秩序。大家視之為理所當然，因無規不成圓，無矩不成方。今次，一齊傾吓校規呢個議題，研究大家求學時期，遇過最無厘頭、最匪夷所思嘅獨特校規，會唔會令你大開眼界，或者了解到當年校規背後嘅教育本意。

Ep.24 打工換宿的奇妙之旅

學生放暑假、SEM Break，指定動作就淨係得返工搵錢、去大公司做實習生呢2個選擇？呢個就係最好的安排，擴闊眼界去體驗生活？定抑或好似今次節目嘉賓JoJo 咁，昂然闊步踏出香港呢片土壤，走出世界，去芬蘭打工換宿，寓遊於學。透過遊歷，發現世界很大；透過當中嘅苦與樂，蛻變成更成熟嘅自己。

是日Amazing嘉賓：JoJo

Ep.23 音樂是如何煉成的

舊社會，如果同人講想做音樂，好多時都係被指係發明星夢；時代進步，大家對文化娛樂藝術認知增加，對相關行業接受程度亦相應提高，究竟成個音樂工業當中，有幾多個唔同崗位？入行方法發展前途等等又係點，今集由音樂人CM同大家上一課。

是日Amazing嘉賓：
CMgroovy - 音樂監製、作曲人和編曲人

Ep.22 星，真係可以全民造？

近年選秀節目「全民造星」成為指標，成就了唔少年青藝人，同時帶動經濟；
但由始至終，節目定調一直都係真人騷，「造星」究竟實際係做啲乜？「星」又係咪真係可以造出嚟？「造星文化」對音樂工業意義又係啲咩？
今集請嚟全民造星首季音樂總監兼同時又係導師嘅CM，同大家由三年前開始講起。

是日Amazing嘉賓：
CMgroovy - 音樂監製、作曲人和編曲人

Ep.21 香港媒體進化史之：你今日課咗金未

舊媒體走到新媒體，平台改變咗，內容改變埋，但最大改變，應該係大家嘅消費習慣。
雖則話內容有價，但回想十數年前，免費資訊同娛樂比比皆是，對比現今，收費娛樂成行成市，究竟改變係幾時出現？
香港的媒體生態，經歷多個浪潮，大家又見證幾多個？

是日Amazing嘉賓：
Max Chu - 前媒體工作者

Ep.20 聽眾踩場：IT人的終極告白

經多次呼籲，青年研究部迎接首次聽眾踩場。
七十二行各有辛酸，但極限只係做牛做馬，唯獨IT，會自稱為IT狗。
究竟IT結界如何開啟，環境、前途、甚至心理建構，箇中情況由嘉賓逐一細說。

是日Amazing嘉賓：
Max Chu - 資深IT從業員

Ep.19 運動員是怎麼樣的職業

好多人都知，喺香港做運動員唔容易；
但實際有幾辛苦，佢哋真正面對嘅壓力，又有幾多人真係了解？
今集繼續有前香港龍舟代表隊成員，分享難忘經歷，同埋如何以一腔熱誠撐落去。

是日Amazing嘉賓：
鄧梓浩 (Jelly) - 前香港龍舟隊運動員

Ep.18 扒龍舟，唔是咁簡單～

喺香港，做運動員唔容易，做冷門運動嘅運動員更加唔容易。
扒龍舟，除咗係端午活動，原來都係一項運動項目！
今集請嚟退役龍舟運動員，分享昔日經歷，以及呢項運動帶嚟嘅喜樂。

是日Amazing嘉賓：
鄧梓浩 (Jelly) - 前香港龍舟隊運動員

Ep.17 香港，可持續發展？(2/2)

地球需要可持續發展，先可以生生不息。
生意同樣需要可持續發展，先可以繼續營運。
要做一盤可以持續發展，有關可持續發展嘅生意，
又係唔係一句「創業難，守業更難」可以講得曬？
本集嘉賓，會分享創立環保相關事業，當中辛酸與喜樂。

是日Amazing嘉賓：
Devana Ng－Invisible Company

Ep.16 香港，可持續發展？(1/2)

人無事，先做到世界冠軍。
地球無事，先可以人無事。
無人會否認，生活係一條選擇題，但問題係，點樣先至係最好嘅選擇。
氣候暖化，塑膠污染，糧食危機⋯⋯地球人，最好嘅選擇，可能係齊心。
關愛地球第一章，大家一齊諗吓，香港點樣可持續發展？

是日Amazing嘉賓：
Devana Ng－Invisible Company

Ep.15 是夢想？還是幻想？(3/3)

喺疫情、移民潮夾縫中成長嘅香港青年人，就好似置身於狄更斯《雙城記》開場白中嘅情況咁，「這是最好的時代，也是最壞的時代」
因為疫情，大家多咗時間思考人生、機會亦隨之而嚟；當機會嚟喇，要追夢，行動力同樣重要。
但願我哋都保持心入面一團火，忠於自己嘅節奏同步伐，追夢三篇最後一章，大家一齊尋找夢想同理想。

是日Amazing嘉賓：
張嘉瑩（雞翼）－演藝學院戲劇學系畢業生｜演員
Iverson－香港青年協會青年研究中心代表

Ep.14 是夢想？還是幻想？(2/3)

李小龍教落，做乜都好，要心志如水剛柔並重
Water can flow or creep or drip or crash. Be water my friend.
追夢，講財力，更加講心力。
從來所有成長都講求土壤，一片土地是否容許追夢。
在於客觀環境，亦在於隔離左右的心境。
今集繼續有兩位嚟自不同界別奮鬥努力中嘅嘉賓，一齊講吓年青人喺香港追夢嘅掙扎。

是日Amazing嘉賓：
張嘉瑩（雞翼）－演藝學院戲劇學系畢業生｜演員
Iverson－香港青年協會青年研究中心代表

Ep.13 是夢想？還是幻想？(1/3)

周星馳話齋「做人如果冇夢想，同條鹹魚有咩分別？」
雖然好多人會認為夢想有分高貴或者廉價，但「追夢」就百分百係昂貴嘅消費。
多謝Mirror 出現，令大家發現追夢未必遙不可及。
但活喺資本主義社會下，想搏盡追夢，就點都要先面對現實。
今集就由兩位不同界別奮鬥努力中嘅嘉賓，一齊講吓年青人嘅基本生活成本。

是日Amazing嘉賓：
張嘉瑩（雞翼）－演藝學院戲劇學系畢業生｜演員
Iverson－香港青年協會青年研究中心代表