Hit Count is 20106.


旅行日期: 2016/05/17

一追再追

我地去旅行不嬲煮到埋嚟就食,準備工夫同交功課一樣吾係hea做就係欠,但我地好好彩,次次吾係死好命就係出路遇貴人。我地嚟個1 day trip, 離開吓莫斯科去吓周邊城市玩吓。金環,我諗大家都有聽過。之所以叫金環係因為九個城市可以同莫斯科連成環狀。係十二十三世紀,金環係俄羅斯重鎮,到後來先將首都遷移至莫斯科。雖然而家已慢慢演變成旅遊景點,但呢啲工藝城市仍然民風純樸,除咗其他人所謂嘅必買手信俄羅斯娃娃外,呢度嘅教堂都好有特色。由於只得一日時間我地就鎖定距離莫斯科兩個幾三個鐘車程嘅Vladimir同埋Suzdal。

老實講去金環有咩嘢睇、點樣去我地真係一啲都吾知。琴晚都係夜媽媽兩條蟲屈係張床搵資料。聽講班車大約8點開,每日得嗰幾班,走咗就冇。我地搵到個火車站名,知道去Vladimir嘅大約票價就瞓咗,見步行步。市內地鐵一早比我地搭到熟哂,感覺同係香港搭地鐵冇乜分別,冇乜陌生感。點樣轉去搭火車都難吾到我地。我地7:45到咗火車站,一心諗住8:12架車先開,諗住買飛仲有時間買份早餐上車食。去到買飛櫃檯先知大件事,啲嬸嬸完全聽吾明我地想點,好啦聽吾明吾緊要,翻譯都得啫,我地拎埋俄文地址比佢。佢好明顯睇得明,左指指右指指再加一大堆火星文。哇救命!即係點呀?!縱使我地頭上有十萬個問號,但我地只能不斷點頭… 身邊買票嘅乘客見我地咁嘅樣都走過嚟幫手,心意係好但就好似變咗二三四五六重唱咁,我地唯一睇得明就係佢地好一致咁指去同一方向。望一望錶52分,跑。順住個方向漫無目的咁跑,心諗邊個櫃檯可以買到飛呀,個火車站又鬼咁死大。不斷問呀問呀先大約知我地要話佢地聽個班次名。好啦好啦,滴哂汗咁搵,有冇攪錯,冇一架去Vladimir,好似呢個地方從來都冇存在過。我地再衝向櫃枱職員問,連續兩個都好決斷咁比個no手勢,意思係我幫你吾到,請你地行開… 56分,我地跑住咁搵班次名,嚟到一個比較隱閉嘅角落,終於比我地見到,8:06開出!嚇死我地,衝去最近嘅櫃枱個職員又指我地去第二度,另一個直頭吾彩我地。急到死嘅時候,我地我隔離個櫃檯博一博。個職員睇得明,仲好快手幫我地攪掂張飛,排係我地後面位婆婆都叫我地跑快啲。8:03,天呀!點解個月台可以咁遠咖?!又安檢又上樓梯,少啲體力都趕吾切… 嗰時正直上班時候,我地完全以打rugby嘅姿態撞散障礙物,上到車坐定定肥蟲1先問我地係咪上啱車… 成功追到第一架火車。

image

image

11:45終於到Vladimir,我地因為冇買早餐,肥蟲2已經餓到頭暈暈,去去吓廁所都差啲瞓低咗。保命要緊,雖然好想餓熱批,但搵極都搵吾到,見到有平熱狗就買咗嚟食。一食,驚為天人,仲好食過香港賣到貴一貴嘅熱狗?吾係因為我地餓過龍,而係佢真心超好味!

image

由Vladimir去Suzdal要一個鐘車程,為咗把握時間,我地即刻去搭巴士!你以為企係巴士站等上到車先比錢就得?nonono!我地兩條肥蟲邊食熱狗邊等巴士,過咗冇幾耐先發現吾妥,一問個司機先知車票係要係樓上買。呢個比起買火車飛容易得多,我地快手快腳趕搭12:20嗰班開往Suzdal嘅巴士,車票上寫明係platform 10等一架 159嘅巴士。我地以為個巴士站就係下面,一眼睇哂。繼續咬住熱狗企係下面等巴士。距離出車時間仲有兩分鐘,見架車仲未到開始急啦。”喂搵個人問吓啦!” “係咪吾係呢度咖?!”都吾理三七二十一衝上一架不知明巴士問司機,佢指住右邊叫我地上呀上呀。咁我地緊係跑㗎,見到有一大段樓梯… 吾係呀,真係係上面呀?喘哂氣咁上到去終於見到所謂嘅巴士站。成車人望住我地,仲要冇座位… 我地就係咁,兩條肥蟲企係架迷你破巴士度一個鐘呆呆咁欣賞窗外嘅鄉村小鎮。

到終點站,肥蟲1以為站隔離就係座教堂。事實係我地被載咗去個荒蕪之地… 語言又吾通,四周全部都係大草原,我地於是決定四圍行吓。冇幾耐我地發現有大洋蔥,係頗遠嘅地方。Suzdal同莫斯科好吾同,佢係一個小鎮,周圍都有天線得得B嘅草地,係路面吾難見到馬拉車接載遊客。人口小,今日又冇乜旅客,係街度行係種享受,寫意又悠閒。佢地嘅屋好有俄羅斯建築風格,木製小屋色彩鮮艷,無論間屋幾舊都好,個窗永遠都雕得好細緻。買咗支雪糕筒行住食,正到痺!image

image

imageimage

imageimage

image

 

行到大約三點我地搭車番Vladimir,本身諗住參觀埋,但無奈地吾夠時間,四點幾要搭火車番莫斯科。到火車站買票先艱難,前面啲乘客個個攪勁耐,我地等咗好耐,排到我地先放technical break, 天啊!又要走去隔離重新再排過…佢有三個櫃檯,前面只有三四個乘客,但我地企都企咗成個鐘。好吾容易買到5:25分火車,望住張車票呆咗。除咗例牌全俄文外,佢無論質感同格式同機票無異,次次都要show passport。張飛冇寫幾號月台,所以我地好似賭大細咁三選一。到咗再問職員,其實任務好簡單,我地淨係想知邊度等火車。但問咗好幾個人,冇一個答到我地。吾係話未夠時間要等下,就話吾係呢班車。結果我地跑呀跑穿越幾個吾同月台。5:26分,點解架火車仲未到,跑去一問先知我地企錯月台,㗎火車準時走咗。我地簡直晴天霹靂,驚死要係度留過夜,見有架火車都係往莫斯科,吾理三七二十一跳上車先算。後尾先知我地買咗貴價飛,但搭平價慢車,所以check飛時啲職員都冇講啲咩,10點到莫斯科。



背包客資料

自從我倆在日本九州嘗試做了第一次背包旅客後,明瞭旅行不止玩樂,更在於與當地人及其他旅遊者的交流,自此便對背包旅遊深深着迷。不同於普通走馬看花的旅行團,背着背包平實走進社區、結識不同背景的朋友、了解彼此的故事。每次的背包遊,認識到的朋友往往成為旅程的亮點。是次旅程我們有機會接觸當地接待家庭、協作單位和受助人士。我們計劃當沙發客,入住莫斯科接待家庭。從中窺探當地人的日常生活,的相處中彼此可作文化上的交流,例如飲食和分享社會議題。我們亦認為在旅行的同時可回饋社會,履行世界公民的責任。在過程中,雙方互動建立互信,友誼非公式,往往出奇不以,卻深刻真摯。
旅遊貼士:
遊記分類 :
地區分類 :
俄羅斯
洗費:

发表评论

电子邮件地址不会被公开。 必填项已用*标注

This site uses Akismet to reduce spam. Learn how your comment data is processed.