Hit Count is 17354.


旅行日期: 2016/05/09

野性西伯利亞

6:45鬧鐘響,琴晚兩條肥蟲瞓得超好完全冇”生保床瞓吾着”嘅問題。而家係攝氏8度,快手換埋件衫就出門口準備you jump I jump,我地位韓國朋友同hostel職員已經係門口等我地。係hostel附近只有一個落水位,其他都係懸涯,跳咗落水吾跌死都會因上吾到岸凍死。職員一而再再而三咁勸我地放棄計劃因為而家落水係非常危險,就連當地人都要等到七八月先游。佢一再表示如果出咗啲咩意外佢地hostel係吾會負任何責任。但其實佢真係好好人,見我地三個女仔仲特登早起陪我地行過過山頭確保我地順利上岸。今朝練過吓啲對白,拍落水前嘅鏡頭都冇問題,但當我地抵達唯一落水處,肥蟲二人終於識得驚啦…

落咗山坡去到一個小海灣,成個海面都佈滿哂浮冰,哇好壯觀呀!我地仲雄心壯志咁想走到深水區,個職員見我地咁瘋癲即刻上前band我地條橋,用帶住濃濃俄國口音同我地講”no deep water, only here, you will cut youselves!” 雖然心思思想行出啲,但唯有見步行步。我地拎支溫度計探吓溫度,點知吾對路喎,肥蟲二表示支針拮吾到入水,望清楚啲先發現成個湖面伸延至岸邊都結咗層薄冰,一探水溫由12°C急降到1°C!!!踩落啲沙度嗰吓…肥蟲一心諗可吾可以吾跳?吾係而家縮沙呀?!我地隻腳都未掂到水,就咁踩住沙都已經又凍又痛。為咗費事整傷自己,我地拋石頭入水整碎咗部分冰面。好遺憾因為能力同環境所限,我地未能係冰湖游水,只可以”浸”。我地落水位置好近岸,但冇得再去深水位因為身後已有一塊大型浮冰。基本上一浸落水第一感覺係極凍,之後就係劇痛同埋麻痹。應該係冇乜知覺,成個腦得個痛字,再浸耐啲我地真心覺得會凍傷同折肢。唉一心諗住拍一次吾洗NG,點知人係有要求嘅我地因為凍到腦閉塞NG咗1次,嗰種凍肥蟲一二表示發夢都仲記得!

上番岸隻都仲仍又痛又痺,整損咗都冇感係翻到房見到流血先知咩事。因為係水裏面嘅溫度仲低過係地面,所以上咗岸冇咁難受,但直至我地行過座山番到hostel隻腳先有番些少感覺。係呢度要多謝Eunji呢位韓國朋友晨咁早起身幫我地拍片,亦要同睇實我地嘅靚仔職員叔叔叔講聲吾該!

image

我地一直覺得係俄羅斯會冇啖好食,咪又係羅宋湯同埋硬過磚頭嘅麵包!但係係Olkhon Island我地可以用好平嘅價錢食到地道農村菜。一食驚為天人!係呢度住兩兩日,每一味餸都超啱我地胃口,肥蟲二差啲連碟都想吞埋落肚!基本上佢地菜式材料簡單,煮法健康,離吾開:洋蔥牛肉薯仔,燉炆焗。早餐好豐富,有碗望落好似白膠漿嘅叫Каша(燕麥粥),基本上一粒燕麥都食吾到,佢地將燕麥磨成粉再加牛奶同糖去煮,甜甜地嘅糊仔肥蟲一表示極度喜歡!燕麥粥、pancake、烚蛋,再加一杯濃茶,太幸福,放低碗碟時記得要同啲侍應講聲Спасибо!

image

當食完早餐執好行裝我地就要準備出發去road trip! 9個人搭住架麵包車去Olkhon Island嘅北部探索,中途要比錢入國家公園。大部分薩滿建築都係國家公園範圍,景點同景點之間都有着一段大距離,加上我地hostel位於南部,沿途會坐住麵包車,所以今日成個trip會由10:30去到17:00。

貝加爾湖對岸係布里亞特共和國,係西伯利亞除咗俄羅斯族人,亦都吾難見到貌似蒙古人嘅少數民族,係呢度布里亞特人就係人數最多嘅少數民族。雖然而家好多人都已經定咗居,但遊牧民族嘅特色都仍然保留落嚟。呢啲遊牧民族信奉薩滿教,認為萬物皆有靈,崇拜一切事物。以前每一個族群都有一位薩滿,大家可以理解為巫師,佢地統領自己嘅族群,有着至高無上嘅地位。族人有病會搵薩滿作法醫治,佢地亦會預測天氣祈求食物豐足。聽落好似吾係幾科學,但的而且確歷史上有出過幾位傳奇薩滿,能醫百病、能與大自然溝通,仲成功帶領族群走出幾次險境。可惜嘅係而家已經再沒有薩滿,只有一啲為做旅客生意嘅人仿照薩滿儀式。薩滿係世襲,但係西伯利亞佢地就有段悲慘歷史,以前蘇聯為咗鞏固係西伯利亞嘅權力屠殺所有薩滿,Olkhon island就係佢地最後避難港。

我地今日同琴日識嘅韓國女仔一齊行。車上仲有位俄羅斯女仔,基本上吾識用英文溝通,我地大部分時間就係問佢俄語發音。雖然因溝通上嘅障礙我地傾吾到好深入但我地感覺到大家對識新朋友嗰種雀躍。

西伯利亞嘅天氣真係變幻莫測,上一秒太陽曬到熱辣辣,下一秒一陣寒風吹過凍到入心入肺。睇相應該都見到呢度天氣好好,太陽突級猛,但曬吾等於暖。係呢度吾帶太陽眼鏡真係會曬到眼盲,肥蟲二話皺眉皺到肌肉酸痛。返到hostel, Alex話今日天氣unusual,正常五月吾會大風,當我地走去十三支薩滿石柱時啲風大到可以吹走我地,嗰下真係驚,個天烏雲密佈,薩滿石柱係山坡上,一行雷我地真係會死硬!當強風時,吾記得帶磨沙臉霜吾緊要,行出室外,啲風連帶沙石會自然幫你打磨光滑(粗暴地)。

image

image

image-76-1024x768

image-89-1024x768

大自然廁所

image-88-1024x768

島上有座對稱岩石叫男女石,如果想生女就行去右邊,想生仔就去左邊。肥蟲一畏高所以就冇爬到上去。

image-77-1024x768

image

晚餐時間又到,一如既往冇令我地失望。一入夜氣溫驟降,手襪、頸巾、羽絨都要出哂嚟,連啲貓仔都入哂去餐廳取暖。餸菜好豐富,薯仔湯配意粉,清淡得嚟又飽肚。千層沙律,最底層係沙甸魚,上層係生洋蔥配煮到熟透嘅紅蘿蔔同埋沙律醬碎蛋,完全係驚喜位,勁好食!燉牛肉好食到吾洗講,rice先係重點,雖然望落同食落冇一忽似飯,望落似薏米食落就有口感得多,肥蟲二好似食上隱!仲未飽?吾緊要仲有甜品–糖霜甜麵包。終極K.O.簡直係人間極品!

image

image-85-1024x768

係呢度不時會見到係木柱上或樹上綁有七彩絲帶,好多人會突登嚟綁祈福絲帶同用硬幣許願,但因為我地冇多餘錢所以就冇咁做啦!

image

星空…你睇過未?香港最多咪又係得西貢有星星,但我地係呢度,凍就凍啲但抬頭一望,多到可以用星塵形容,香港…自然冇得比。番到房冇耐大停電,唯有拎住電筒執backpack同打呢個blog,去旅行真係咩都有機會發生。

image



背包客資料

自從我倆在日本九州嘗試做了第一次背包旅客後,明瞭旅行不止玩樂,更在於與當地人及其他旅遊者的交流,自此便對背包旅遊深深着迷。不同於普通走馬看花的旅行團,背着背包平實走進社區、結識不同背景的朋友、了解彼此的故事。每次的背包遊,認識到的朋友往往成為旅程的亮點。是次旅程我們有機會接觸當地接待家庭、協作單位和受助人士。我們計劃當沙發客,入住莫斯科接待家庭。從中窺探當地人的日常生活,的相處中彼此可作文化上的交流,例如飲食和分享社會議題。我們亦認為在旅行的同時可回饋社會,履行世界公民的責任。在過程中,雙方互動建立互信,友誼非公式,往往出奇不以,卻深刻真摯。
旅遊貼士:
遊記分類 :
地區分類 :
俄羅斯
洗費:

发表评论

电子邮件地址不会被公开。 必填项已用*标注

This site uses Akismet to reduce spam. Learn how your comment data is processed.