Hit Count is 20109.


旅行日期: 2016/05/15

肥蟲版人在野(第二回)

兩日一夜嘅survival training仲有幾有幾個鐘就完,肥蟲二人表示終於盼到出頭天、人生開始有希望。你問我係荒山野嶺瞓吾瞓到覺?絕對瞓到仲要似係昏迷咁款。成晚個shelter不斷發出怪聲,好似隨時要散咁。我地都廢事理佢,心諗壓死我啦,死咗吾洗再玩啦。吾好以為有得瞓就可以鬆懈,我地成晚有兩件事要做。第一:包實自己。俄羅斯嘅蚊同人一樣都係打吾死。好采嘅話你殲滅到一隻,但仲有成千上萬隻奇異蚊想一親香澤。如果我地有電蚊拍,我諗每秒都應該啪啪啪啪,仲精彩過放爆杖。我地包得實過密實袋,內層着哂所有衫,載哂所有帽,連眼都睇吾到。外層嘅羽絨睡袋由內拉埋拉鏈再打個結,確保一隻蚊都飛吾到入嚟。吾好以為咁就好穩陣,啲飛蚊聲我地到而家合埋眼都聽到。睡袋外嘅狀況就好似一大堆烏蠅嬲住啦糖,極恐怖。如果有一隻蚊飛到入嚟會有幾可怕大家可想而知!第二:守夜。之所以要守夜係因為要確保大家嘅火堆吾熄、吾好比啲火燒着個shelter,同埋小心野生動物。七個人以抽籤方式決定當席時間,每人大約守一個鐘十五分鐘。第一更11點開始,我地會由00:10堂到2:30。Daniil不斷幫我地加柴,又吹又叠我地先冇咁凍。佢都算吾話得,當到00:45先叫醒我地。一起身見大佬仲未瞓,太好啦有人陪!我地大約每人睇兩個火,為咗keep住個火燒得旺,我地要不斷加柴。你吾好以為易,點樣擺位,加邊類型嘅柴都好講究。我地呢兩條廢廢地嘅肥蟲冇咩目標,就係吾好比個火熄,吾好比人凍死,你都咪話吾大壓力,我地睇錶都睇咗無數次想快啲交更!大佬真係好好人,可能知我地姐手姐腳,佢都一齊幫我地睇火。大大碌嘅樹幹係好難搵,我地一直執啲細細碌,只可以充撐吓幾秒場面。而大佬一直就好似變魔術咁抬啲粗身樹幹過嚟拯救我地。佢吾出聲,只係默默咁check住情況,肥蟲2表示極感動。

清晨4點,個天已經光,啲雀仔又開始叫。琴晚個火大到就嚟燒着腳趾,而家就鬼死咁凍,見瞓落去吾係辦法,就諗住起身透火取暖。一起身就見到大佬幫我地加柴,原來佢成晚冇瞓過,肥蟲2見到簡直想喊出嚟!我地淨係呆到成隻糭咁坐係度望住佢加火,肥蟲1就不斷打蚊,黐哂線咁打好,唉其他人仲瞓緊,無奈地肥蟲2叫吾停佢… 大佬仲好好人咁比支水我地飲。過咗成個鐘個魂魄先歸位去幫手加柴,完全係報答佢地咁多位嘅唯一方法。

7:00所有人都起咗身,煲水沖茶飲。我地臉又冇洗牙又冇刷,有一大杯熱茶暖吓身真係好幸福(池塘水仲好飲過蒸餾水)。當佢地煮緊俄式通粉時我地就繼續加柴睇住人地個火。因為冇哂水,我地兩個拎住個兜好似人地玩越野障礙賽咁走咗入塊類似濕地嘅地方拎池塘水。極多蚊,雖然出面已經夠多蚊,但呢度係出面嘅兩倍。其他人就醒,入都吾入泥。可憐嘅我地拎住塊棉布、一個水杯同埋個大兜,都冇手拍蚊…出翻嚟咪成個豬頭咁囉,唉,肥蟲2隻右眼仲針到好似比人打腫咗咁…水係啡色但至少冇咗啲固體枯枝樹葉沙石蝌蚪,肥蟲二拎住兜水舉步維艱咁行番出去。出到去,咩話?點解會咁咖?原來行出去嘅時候掃到嘅樹葉都跌哂落去…

上面呢條link係教練叫我地去過濾水既時候拍既短片,可以睇到好多蚊,不過真實既時候係多好多倍,只係拍唔到咋!

呢個時候啲水都未飲得,要再進一步去濾。我地要番個火堆攞木炭。吾係所有望落似炭嘅物體都可以濾水。一摙就碎嘅一律吾可以用,只可以用啲受力冇變形嘅。呢個就係樹嘅分別,我地燒嘅多數係小柴枝,有用嘅木岸吾多。因為個火啱啱先熄,啲炭仲係超熱我地拎住枝樹枝試佢地硬度,最後先徒手試,攪到成隻手黑哂吾係問題,肥蟲1仲辣親隻手添。

我諗有睇過大長今都知木炭有淨化嘅功用,最底層放咗又厚又密嘅地衣,之後再加層木炭,加水入去過一陣再慢慢滴啲水出泥,啲水就會似番我地平時飲嘅水一樣無色。

係等嘅時候,我地開始學點樣用指南針,例如計住步數望住方向行翻原點等。亦都有學繩結,由於我地之前有學過,所以好快上手,可以算係我地最拿手嗰範。我地大約11點就要離開營地,所以我地要開始搵路去最後一個check point。我地有5分鐘時候畫地圖,距離呀,分叉路呀咩都要記得,大家畫完再一齊比對參考。

image

Forest tea

畫完我地就用頭先過濾咗嘅水去整Forest Tea。Forest Tea你地未聽過呢,吾係係森林飲嘅茶咁簡單,佢係一杯真正有森林味嘅茶!琴日起shelter我地已經對fir tree又愛又恨,冇咗佢吾得,但要用佢首先要犧牲你兩隻手。飲茶最緊係茶葉,用咩葉?Sorry又係用極多用途嘅fir tree,我地一聽到成個人都已經怯咗怯。我地有幾分鐘時間做採茶姑娘,摘嘅係最頂嘅嫩芽,有幾多就摘幾多。我諗係森林過得耐好多嘢都吾會理咁多,我地都係徒手摘,新傷舊傷係哂度,完全吾見得人,不過算啦由佢啦,咩every scar tells a story呀嘛。池塘水配樹葉,煲出嚟係泥色,但卻出奇地好飲,酸酸地有豐富維他命C,感冒飲最啱!

要走啦,shelter可以保留,但其他所有嘢要回復原狀,臨走時仲要有甜品,聽落係咪好高級呢~其實係將砂糖放係個鐵罐度再真接放落火堆燒。點樣食?隨地攞枝樹枝點嚟飲?你以為冇人吼?錯,係要搶咖!

出發去教堂佢地嘅方向感真係一流,自從琴日數錯步數後,都吾敢出嚟害人,今次都係另請高明啦!今日總共要行十幾km,我地要帶埋個火一齊去,所以沿途要摘菇餵住個火。去到嘅教堂係建於中世紀,因為二次世界大戰作為軍事區域,所有木製民居都要遷移,而呢啲磚頭起嘅建築就荒廢係喥。

image

終點教堂

image

用衫同樹枝抬起傷者

我地要學點樣處理傷者,止血呀固定骨折呀通通都要知。係冇三角巾、紗布、膠布嘅情況吓我地用樹幹同套做擔架。Alica做傷者,我地幫手四個人一整枱。放上膊頭,天呀,重到我地條鎖骨好似斷開咁,你殺咗我啦,再行落去我地就變傷者咖啦。教練仲話要抬1 km,聽到都暈。

為咗趕4:10嘅巴士,我地開始回程,行咗冇耐有架車駛過,個司機雖然講俄文,但我地get到就係有順風車搭!!!雖然有咩事保險吾賠,但理得佢,個個跳上㗎好似載豬嘅車嘅車尾。我地都係啱啱夠位,刺激過玩過山車。條路好崎嶇,我地不斷被拋離地下。我地仲要坐最後,身後嘅木板睇落極度化學,只有兩粒螺絲固定。只係希望被拋出車外前有人捉得住我…

搭完巴士我地仲要再轉火車先番到莫斯科,翻到去已經7點幾。咩相聚係為咗離別,我地真係超討厭呢句。我地嘅六位朋友個個都好好人好照顧我地,雖然只得三位識講基本英文,溝通有困難,但我地真心感受到佢地好錫我地。特登買朱古力比我地食,帶我地搭地鐵,介紹新景點比我地,我地都有keep住聯絡。而家個facebook多咗火星文字,但係google翻譯下我地知道佢地成日鑽我地brave brave brave,講真比起佢地,我地又算得上啲咩喎!

道別永遠係最難,有可能我地永遠都吾會再見,往後只可以隔住個熒幕得知大家近況。但我地真心感激每一位,佢地嘅風度同係極端環境吓展現嘅人性光輝,我地永遠都吾會忘記。係佢地改變我地對俄羅斯人嘅睇法。只要攞個心出嚟,年齡、種族、語言都吾係做朋友嘅障礙。



背包客資料

自從我倆在日本九州嘗試做了第一次背包旅客後,明瞭旅行不止玩樂,更在於與當地人及其他旅遊者的交流,自此便對背包旅遊深深着迷。不同於普通走馬看花的旅行團,背着背包平實走進社區、結識不同背景的朋友、了解彼此的故事。每次的背包遊,認識到的朋友往往成為旅程的亮點。是次旅程我們有機會接觸當地接待家庭、協作單位和受助人士。我們計劃當沙發客,入住莫斯科接待家庭。從中窺探當地人的日常生活,的相處中彼此可作文化上的交流,例如飲食和分享社會議題。我們亦認為在旅行的同時可回饋社會,履行世界公民的責任。在過程中,雙方互動建立互信,友誼非公式,往往出奇不以,卻深刻真摯。
旅遊貼士:
遊記分類 :
地區分類 :
俄羅斯
洗費:

发表评论

电子邮件地址不会被公开。 必填项已用*标注

This site uses Akismet to reduce spam. Learn how your comment data is processed.