Hit Count is 30745.


旅行日期: 2016/05/28 00:00

嚇家菜,客家菜?

我地Mega Lads今次行程其中賣點係用客家菜同俄羅斯人baTTle廚藝同分享飲食文化。點解要係客家菜?你可能會答:咪因為隊入面有兩個出身客家世家既隊員囉。雖然小編好想講世事都被你看透了,但其實邊有咁簡單呀!少年你太年輕了。我地身處香港,最接近廣東,當然經常接觸到廣東菜,即係粵菜。所以分享粵菜文化當然係理所當然啦!但係粵菜並唔係咁簡單,佢有三條分系:廣州菜、潮州菜同東江菜。而東江菜亦即係客家菜啦!所以,我地帶過去分享既可以講係我地香港人會常接觸到既廣東菜啦!客家菜大家唔多唔少都會食到或者聽過,釀豆腐、梅菜扣肉、盆菜等菜肴都其實屬於客家菜(小編肚餓,但小編不說)。如果大家食過客家菜,都唔難發現客家菜係好咸,味好濃,甚至有少少肥膩。整得咁重口味其實都有段故既(每次殺不死你,殺不死你,也醫好你)相傳客家人係秦朝至宋朝初,千里迢迢咁由中原向南遷移至廣東一帶,然後發展出現有既客家文化。遷移途中攀山涉水,日曬雨淋,為左好好補充體力,當然要煮返味重、鹽份高、脂肪高既食物啦。而為左遷移途中方便攜帶食材,客家人採用鹽腌食物,防止食物腐壞。所以客家特產當中都不乏腌製食物,例如咸酸菜及腌蘿蔔乾等。又有另一種講法話客家人定居之後,以務農為生。每日「鋤禾日當午,汗滴禾下土」,為左補充失去既鹽份同體力,所以好多菜肴都偏咸,好送粗茶淡飯。話說Mega Lads兩位客家隊員都超鐘意鄉下既客家燜鴨。佢地話細細個返到鄉下就會食到喎。而到大時大節,客家燜鴨(或者有時係燜鵝)都係餐桌上既指定菜肴。就好似香港人大時大節都緊要有隻雞咁。我地隊員貓仔既鄉下新年既時候,佢既親戚都非常鐘意自家整客家燜鵝,仲要係新鮮早上自家後園劏完就燜,下晝果餐就食。果種新鮮味道係非筆墨能形容。食剩既就第二朝拎黎煲粥做早餐。如是者,新年返鄉下幾多日,就食足幾多日燜鵝。但係老人家就成日講,鵝肉係熱毒既……而且佢仲非常鐘意食鵝旺(即係鵝紅,亦即係鵝血,基本上成隻鵝咩部位都食得),唔熱毒都幾難,所以新年後成口痱滋就無可避免。而隊員貓仔表示:雖然唔係美女廚房,但都係食左先講:D!有關客家既回憶當然唔少得咸酸菜同腌蘿蔔乾啦。返到鄉下當然唔係食完燜鴨、燜鵝就拍拍「蘿柚」就走人咁簡單啦。向水貨客發明由香港運貨返大陸之前,向香港定居既客家人已經識得運野落香港食啦!燜鴨/鵝當然唔少得啦(究竟有幾鐘意食呀=.=?)!咸酸菜同腌蘿蔔乾通常都走唔甩。呢兩樣野簡直係客家人既精髓:味!道!重!而且係氣味個味!係氣味個味!係氣味個味!很重要所以要講三次。每次返鄉下,一個鐘既車程就一定走唔甩,而向呢一個鐘入面,佢地既氣味就有可能因為包得唔夠密實既關係充斥成架旅遊巴,而且好多時都會漏汁!嗯,屋企人每次後悔,之後每次都會買。就係咁,呢種經驗就成為左兩位隊員兒時既可怕回憶。(其實到依家都會帶)(隊員Sherman表示個喼臭到只可以掉左佢)出發去俄羅斯之前,我地會跟隨隊員Fiona返去佢鄉下體驗一下客家人既熱情同好客,同埋我地會拜師學整客家燜鴨!究竟成果係點?做唔做到張圖咁正,大家就要密切留意啦!

客家燜鴨釀豆腐 梅菜扣肉



背包客資料

當你認為「戰鬥民族」極強壯、極彪悍的時候, 有沒有想過他們是「極能煮」? 我們將到俄羅斯向當地人學習傳統俄菜, 並進行街頭料理對決。屆時將於同一時間進行網絡直播, 讓各地朋友與我們共同經歷有趣的旅程! 敬請留意啊!
旅遊貼士:
遊記分類 :
地區分類 :
廣東
洗費:

Leave a Reply

Your email address will not be published. Required fields are marked *

This site uses Akismet to reduce spam. Learn how your comment data is processed.