Hit Count is 19934.


旅行日期: 2016/05/18

家的溫暖

一朝早起身飲杯自己帶既即沖咖啡,抖咗陣都已經中午。由於肥蟲們對KFC既美味雞念念不忘,午餐決定到hostel附近既KFC食。呢間KFC樓高兩層,係歐洲建築特色既大樓地下。又叫咗個十六件雞筒裝,兩包薯條,一杯大可樂,又係滿足既一餐。image

之後就起程去遠離市中心少少既托兒所。第一次去呢個未踏足過既社區,有啲陌生,揾路揾咗一段時間,去到一間類似學校既地方,估計應該係我地要揾既托兒所。於是就打俾聯絡既負責人,同佢講到咗,之後無耐就見到佢係門口等緊我地啦!佢叫Lusia, 英文唔算話非常好但都算溝通到,亦係一位好親切的女士,經常笑容滿面。

image

image

佢帶我地去到一個廚房連餐桌既地方,仲好好咁沖咗兩杯綠茶俾我地飲又問我地一唔一齊食啲野,不過可惜岩岩食咗野啦。佢一邊同我地講解呢度住既小朋友既情況同機構運作,另一邊不停有啲小朋友行嚟行去問Lusia野,感覺佢就好似佢地既屋企人咁,因為其實Lusia就係負責照顧佢地,同佢地一齊住一齊生活,見證住佢地既成長。係呢度住既小朋友都係因為屋企照顧唔到佢地,例如媽媽懷孕,屋企經濟或者環境唔許可等等,平日一至四、五佢地就係呢度住,到假日就會返屋企住,型式有啲似寄宿學校。係托兒所住既小朋友都要自己照顧自己,由洗衫,燙衫,清潔廁所睡房,洗碗碟等都要佢地自己做,令佢地學識獨立。就好似下圖呢位小朋友咁,食完野就自己洗返乾淨啲碗碟,可以話比香港怪獸家長孕育既港孩有過之而無不及。

image

image

由於啲小朋友每星期只有一堂英文課,英文程度可以想像到唔會好,所以我地就利用今次做義工既時間,教同解答佢地功課或者學英文遇到既問題。有位小朋友Amir佢十分好學,一開始我地只係用啲英文課外書教佢地,但佢就想學多啲,攞咗自己本教科書嚟。又有一位小朋友叫Jasmina佢想做好啲功課但唔識做就攞嚟問我地,睇得出佢地好俾心機學好語言,奈何只係無足夠既資源俾佢地。今次義工因為時間有限,所以同每位小朋友一對一上堂既時間都唔長。後尾每位小朋友都補過一段時間,就教佢地摺紙同陪佢地踢足球。

image

image

image

image

肥蟲二俾班男仔捉咗去踢足球,肥蟲一就同班女仔一齊摺紙。由於肥蟲一摺紙都唔算太叻,要一邊開住youtube學一邊同班小朋友摺。有位小女孩Ann學野超快,呢頭個短片做完一個步驟,果頭佢已經摺好呢步,肥蟲一則表示仲睇緊點摺,仲有時俾Ann教返轉頭添。雖然有啲無地自容,但呢種一齊學習既感覺好似同學仔咁唔錯。之前特登學咗點摺兔仔,教完呢樣佢地就想學其他佢地鍾意既動物,結果就揀咗學摺貓貓、狗仔同蝴蝶結。肥蟲一表示有驚無險成功教完佢地摺。肥蟲二去咗踢足球,但其實肥蟲二運動細胞幾乎零,不過Lusia語佢地踢得唔叻,肥蟲二諗住應該都係慢慢跑追下個波,點知一落場佢地係無友情講,十分認真之餘踢得十分激烈。落到場其實唔係去踢波而係盡量避免個足球整到自己。俾個波踢到幾下心口、手腳已經好好,後來肥蟲一加入,被誤中頭部痛死…本身諗住做到六點幾走,點知一做就做到八點幾,佢地都差唔多時候要去教堂祈禱,我地都走啦。走果陣啲小朋友好唔捨得問我地聽日會唔會嚟,當然係用俄文講完Google translate俾我地睇啦,我地於是就決定攞聽日一啲空閒時間再嚟做義工。啲小朋友仲好sweet咁攬實我地先走,真係好溫暖。

image

 



背包客資料

自從我倆在日本九州嘗試做了第一次背包旅客後,明瞭旅行不止玩樂,更在於與當地人及其他旅遊者的交流,自此便對背包旅遊深深着迷。不同於普通走馬看花的旅行團,背着背包平實走進社區、結識不同背景的朋友、了解彼此的故事。每次的背包遊,認識到的朋友往往成為旅程的亮點。是次旅程我們有機會接觸當地接待家庭、協作單位和受助人士。我們計劃當沙發客,入住莫斯科接待家庭。從中窺探當地人的日常生活,的相處中彼此可作文化上的交流,例如飲食和分享社會議題。我們亦認為在旅行的同時可回饋社會,履行世界公民的責任。在過程中,雙方互動建立互信,友誼非公式,往往出奇不以,卻深刻真摯。
旅遊貼士:
遊記分類 :
地區分類 :
俄羅斯
洗費:

Leave a Reply

Your email address will not be published. Required fields are marked *

This site uses Akismet to reduce spam. Learn how your comment data is processed.