今日係我地係環保組織Little Earth 服務既最後一日，Anton 邀請我地一齊去行山，佢話無論工作幾忙都好，都要抽時間同大自然相處。塔吉克既山路同香港既行山徑好唔同，似爬山多過行山，我地全程都要手腳共用，先可以登頂。

終於到頂喇！Anton 帶左爐具同我地一齊燒雞翼。被群山包圍住咁燒野食，我地真係第一次。仲可以見到好靚既瀑布，幾辛苦都值得啦。

食完雞翼，我地今日既任務先正式開始！我地要一路落山，一路執沿路既垃圾。垃圾既數量比我地想像中多好多，好多膠樽膠袋，塑膠要好多年先可以分解，對大自然既禍害好大。最後我地執左四大袋垃圾，睇黎我地真係要減少使用即棄塑膠產品喇！

今晚係我地係杜尚別的最後一晚，我地請左Anton 同佢既朋友黎我地屋企食飯。我地煮左幾味香港既家常小菜比佢地試下，加埋從香港帶黎既港式奶荼，我地過左一晚好開心既Hong Kong Night。雖然我地只係識左短短幾日，但好多謝Anton 同佢既朋友帶左我地去好多地方，認識多左佢地既文化。有機會黎香港，等我地帶你地去玩啦！