曾經係屋企嘅小公主，本應無憂無慮咁成長，過住開心又簡單嘅童年。生於喺內地都算係小康家庭嘅玉樺，人生本應該比其他人順利，但係一次家庭糾紛改變咗佢嘅命運。

由細到大，爸爸一直都錫愛玉樺，佢哋嘅關係好好。直到玉樺８歲嗰年，爸爸突然中風，之後爸爸同啲親戚拎走咗啲錢同其他值錢野。呢件事之後，爸爸同媽媽就開始鬧交，然後有一日，玉樺放學返嚟就唔見咗爸爸，唔知佢去咗邊。

雖然當時嘅玉樺仲係個小朋友，但都察覺到情況有啲問題，但不敢當面問媽媽發生咩事。

自從爸爸離開咗，屋企就冇咗經濟支柱，本來係家庭主婦嘅媽媽突然間要出去做好多份工，玉樺亦開始覺得好孤單。

本應該係享受家庭幸福嘅雖然，突然間要面對咁大嘅轉變，表現得好成熟，控制住自己嘅情緒，唔想畀其他人擔心。

媽媽變成咗經濟來源，原本完整嘅一個家，突然變成得佢地兩個人相依為命。為咗減輕負擔，媽媽同玉樺搬去咗深圳嘅親戚屋企住。

除咗情緒上嘅轉變，仲要適應因為搬去深圳而帶嚟嘅生活改變。每日要由深圳去香港返學返屋企，車程來回都要六、七個鐘，玉樺身體唔係好，所以唔可以坐太耐車，會覺得好辛苦，每日都好攰。

要適應新生活真係好困難。雖然玉樺好堅強，亦都好努力嘗試融入，但仍然遇到好多障礙，好難前進。不過玉樺唔捨得看媽媽一個人咁辛苦工作，係放假嗰陣佢會乖乖跟住媽媽返深圳嘅工廠幫手。

對於呢種與眾不同嘅童年，玉樺都接受咗。佢知道自己同其他同學嘅生活唔同，有時都會羨慕佢哋，但係佢接受咗呢個現實，因為都無其他辦法。

兩母女寄人籬下，除咗要自力更新，咬緊牙關咬過經濟上嘅困難外，仲要受盡冷眼，但兩母女都默默忍受，直到發生咗件令佢們跌入谷底。

有一次，因為親戚同媽媽之間發生誤會，親戚將佢哋趕咗出門口，兩母女流落街頭。佢哋感到非常無助，唔知道之後條路應該點行。她們坐咗公園，媽媽一向係玉樺心目中好似女超人一樣咁堅強，但第一次佢係玉樺面前喊出嚟。睇住媽媽嘅眼淚，玉樺心如刀割，同時也覺得極度迷惘。

媽媽喊住咁同玉樺講：「如果不是因為你，我都捱唔到落去。」呢句說話，玉樺呢一世都記起心底，同時都令佢一夜之間長大。嗰一刻，玉樺決定咗要努力讀書，孝順媽媽，而且不可以再畀任何人蝦媽媽。只有獲得知識，先可以改變自己和媽媽嘅命運，無論面對多大的困難，玉樺都會為咗媽媽而奮力向前。

嗰晚之後，佢哋終於搵到另一個親戚願意收留佢哋。過咗一段時間，佢哋終於搬到香港，係大澳同姨媽一齊住，安定落嚟。重新在大澳生活，玉樺雖然要再次為適應新環境而感到苦惱，但心態已經不同之前。

大澳嘅環境比較舒服，玉樺喺大澳返學，唔使成日搭車，可以專心啲學習。而且姨媽對佢哋都好好，雖然玉樺比較內向又唔鍾意同人傾偈，但都好努力融入香港生活。

本以為終於可以開始新的生活，無諗到，玉樺爸爸通過親戚找到了佢哋，再次相見，玉樺內心不禁產生咗一啲厭惡同憤怒，唔係好想見到佢。

爸爸嘅不辭而別，破壞咗玉樺平靜嘅童年，再次出現，想彌補曾經破裂嘅關係。要重新修補呢段關係，需要好多心機同耐心。聽著媽媽嘅勸告，玉樺每隔幾個星期就會同爸爸見面，畀呢段父女關係一個新機會。

玉樺慢慢感受到爸爸嘅誠意，爸爸會做好多事情去彌補玉樺，會很主動地關心佢，當玉樺病個時爸爸都會好擔心，又會記得玉樺生日同為佢慶祝。佢哋前前後後總共用咗四年時間，一步一步建立返呢段父女關係。

父女關係越來越好，但爸爸嘅身體卻日漸變差，玉樺內心嘅怨恨越來越少，反而變成咗擔憂，心入面好驚爸爸再一次離開自己，而呢次嘅離開將會係天人相隔。

可惜天意弄人，2014年嘅暑假，爸爸最終因為肺炎離世，令玉樺最遺憾嘅係趕唔切去醫院見爸爸最後一面。爸爸的離開，終於為玉樺呢段像過山車一般嘅童年畫上句號。

學習接受失去至親，從來唔係一件容易嘅事情。除咗要感謝一直相依為命嘅媽媽，玉樺亦都係慶幸係呢段艱難嘅人生道路上遇到咗一位改變佢一生嘅好老師——吳翠瑤老師。

吳老師會陪佢傾計，會畀好多唔同嘅意見，同時令玉樺學識唔好咁執著，因為執著就係痛苦嘅根源。

另外，吳老師知道玉樺比校較內向，所以經常帶佢出外參加義工活動，令佢學習到點樣面對困境 ，明白到呢個世界上有好多人需要我哋幫助，所以玉樺決定將來要做一份可以幫到其他人嘅工。

睇住好多同輩嘅學生或者年青人了斷生命嘅新聞，作為一個曾經走過谷底的過來人，玉樺希望用自己的經歷去鼓勵其他人珍惜生命。

或者我哋嘅生命唔係一條平坦嘅路，可能有好多彎位同高低位，但係都唔好咁輕易放棄。要相信，只要堅持落去就會有希望，當你經歷最黑暗嘅時候，你就會見到光線。記得老人與海嘅精神。 ——「人可以被摧毁，但唔可以被打敗。」

或者對好多正在經歷生命低潮嘅人嚟講，再多嘅安慰和支持說話都係無用，但希望你都願意相信，終有一天，你都可以逆轉你嘅人生，為自己贏一次。要記得輸並不可怕；最可怕嘅係，你放棄了抗爭嘅機會。